Trupult at skyna á, hvør er stakur

Trupulleikar, við at allýsa hvør er stakur uppihaldari, var orsøkin til, at ein meiriluti í Løgtinginum valdi at vraka eitt uppskot um at tvífalda barnafrádráttin fyri stakar uppihaldarar.

Í aðru viðgerð  í gjár av uppskoti hjá Tjóðveldisflokkinum um at tvífalda barnafrádráttin hjá støkum uppihaldarum, kom fram, at við verandi skrásetingum tykist trupult at fáa hugtakið ’stakir uppihaldarar’ allýst. Hetta gjørdist grundgevingin til at eini meiriluti í Løgtinginum valdi at fella uppskotið.

Fíggjarnevndin hevði undir viðgerðini av málinum fund við Føroya Kommunufelag, Kommunusamskipan Føroya, Hagstovnuna, Bárð Nielsen, landsstýrismann í fíggjarmálum, Hans Paula Strøm, landsstýrismann í almanna- og heilsumálum, og Annitu á Fríðriksmørk, løgtingsmann, og øll tyktust samd um trupulleikan í at lýsa, hvør er stakur uppihaldari, og hvør ikki er.

 

Samd men ósamd

Hóast øll fíggjarnevndin tyktist samd um, at nógvar góðar grundir eru fyri at gera tiltøk fyri summar stakar upphaldarar, og øll nevndin var eisini samd um, at tað kan vera ringt at fáa hugtakið ’stakur uppihaldari’ allýst og tí trupult at fáa teir røttu persónarnar at verða umfataðir av uppskotinum. So býtti fíggjarnevndin seg í ein meiriluta og ein minniluta.

 

Ov stór umsiting

Meirlutin við Anfinni Kallsberg, Vilhelmi Johannesen, Kaj Leo Johannesen  og

Lisbeth L. Petersen helt, at hetta fór at krevja munandi umsiting, ið ikki hoyrir heima hjá skattavaldinum, men er eitt almannamál. Tí mælti meirilutin tinginum Løgtinginum frá at samtykkja uppskotið.

Minnilutin við Kára P. Højgaard, Páll á Reynatúgvu og Karsten Hansen helt somuleiðis tað verða óheppið, um hetta varð lagt til Toll & Skatt at umsita, men sá hinvegin ikki teir stóru trupulleikarnar í at lata almannaverkið umsita eyðmerkingin av, hvørjir persónar skulu verða umfataðir av rættinum til dupultan barnafrádrátt. Tí mælti minnilutin Løgtinginum til at samtykkja uppskotið.

 

Øll vita, hvat ein stakur uppihaldari er

Í tingviðgerðini  funnust Bill Justinussen og Jenis av Rana at meirilutanum, fyri  ikki at hjálpa einum bólki, ið, øll tykjast samd um, hevur tørv á hjálp, orsakað av, at onkur, ið ikki hevur rætt til hesa hjálp fer at misbrúka skipanina. Bill Justinnussen segði, at hann vónaði, at samgongan fór at taka stig til, at hesin bólkur varð hjálptur í almanna skipanini, um tey feldu hetta málið. Bill Justinussen vísti á, at øll vita, hvat ein stakur uppihaldari er. T átti tað ikki at vera so trupult at viðtikið hetta mál. Høgni Hoydal helt, at tað var merkisvert, at samgongan skuldi allýsa júst hetta mál, so væl, tá hon í so nógvum øðrum førum tók avgerðir uttan nakra sum helst allýsing. Bill Justinussen vísti eisini á, at um onkur fekk pening av órøttum, so kundi landið krevja pening aftur.

 

Undanførslur

Annita á Fríðríksmørk og Jenis av Rana mettu, grundgevingarnar hjá meirilutanum at vera undanførslur, tí at tey í veruleikanum ikki ynsktu at hjálpa teimum veikastu. Annita á Fríðríksmørk vísti á, at tá meirilutin velur at vraka hetta uppskotið, tí at tað ikki er skattamál, men samstundis ikki heitur á Landsstýrismannin í almannamálum, um at taka málið upp, so tykist meirilutin ikki áhugaður í at loysa trupulleikan fyri henda bólk. Hon helt tí manglandi allýsingina vera ein stóran trupulleika, ið átti at verða loystur sum skjótast. Hon spurdi eisini, um hvat samgongan ætlaði at gera fyri at fremja hesa allýsing.

Lisbeth L. Petersen vísti atfinningunum hjá Annitu á Fríðríksmørk og Bill Justinussen aftur, hon vísti á, at bólkurin einsamallur uppihaldari mátti lýsast fyrst, soleiðis at býtið varð rættvíst. Tí lóggávan skal innrættast soleiðis, at hon rakar tey, ið veruliga hava ein tørv.

 

Leitaði eftir semju

Páll á Reynatúgvu harmaðist um harða orðavalið, ið kjakið hevði verið merkt av. Hann heitti á tingið, um at arbeiða víðari og royna at finna semju í hesum málinum, sum snýr seg um tey veikastu í samfelagnum, hann var sannførdur um, at allir tingmenn hava áhuga í at hjálpa hesum bólki.

Teitur á konsertferð

London, Manchester, Berlin, Stockholm og Keypmannahavn eru millum støðini, ið Teitur vitjar á 27 konsertum komandi  tveir mánarnar.

 

Nýggja fløgan hjá Teitur er liðugt innspæld og ljóðblandað, og í gjárkvøldið fór Teitur undir nýggja konsertferð í Evropa. Fyrsti partur av konsertferðini er sum upphiting fyri donsku songkvinnuna Tinu Dickow. Her er talan um 8 konsertir í 10 dagar. Allar verða í Bretlandi. M.a hevur Ingi Højsted møguleika at sleppa á Teitur konsert í Glee Club í Birmingham hóskvøldið.

 

Síðan fer Teitur til Danmarkar, har hann við bólki fer á pallin í Templet í Lyngdby 13. apríl. Hetta er tann fyrsta av fyribils 19 konsertum við bólki í Danmark, Týsklandi og Svøríki. Eingin ivi er um, at serliga nógvir føroyingar verða á konsertini í Amager Bio í Keypmannahavn 19. apríl. Amager er høvuðstaður fyri føroyskar útisetar og Amager Bio liggur beint yvir ein kilometur frá sjálvum føroyska miðdeplinum Oyrasundskollegiinum

 

Enn er eingin endaligur útgávudagur almannakunngjørdur fyri nær nýggja fløgan kemur út. Men fyribils ber til at hoyra nýggju løgini á hesum støðum:

 

Uttan bólk sum upphiting fyri Tinu Dickow

04/04/2006 08:00 PM  –  Academy 2  í Newcastle

04/05/2006 08:00 PM  –  The Maze í Nottingham

04/06/2006 08:00 PM  –  Glee Club í Birmingham

04/09/2006 08:00 PM  –  Night and Day  í Manchester

04/10/2006 08:00 PM  –  The Stables í Milton Keynes

04/11/2006 08:00 PM  –  Arts Centre í Reading

04/12/2006 07:30 PM  –  Dingwalls í Camden Lock í London

 

Teitur konsertir við bólki

04/13/2006 09:00 PM  –  Templet í Lyngby

04/15/2006 08:00 PM  –  Stars í Vordingborg

04/16/2006 08:00 PM  –  Bryghuset í Møn

04/19/2006 07:00 PM  –  Gjethuset í Frederiksværk

04/22/2006 07:00 PM  –  Det Bruunske Pakhus í Fredericia

04/23/2006 09:00 PM  –  Magnet í Berlin

04/24/2006 08:00 PM  –  Ampere í München

04/27/2006 09:00 PM  –  Von Hatten í Randers

04/28/2006 08:00 PM  –  Godset í Kolding

04/29/2006 08:00 PM  –  Viften í Rødovre

05/12/2006 08:00 PM  –  Kulisselageret í Horsens

05/13/2006 08:00 PM  –  Tobakken í Esbjerg

05/15/2006 08:00 PM  –  KB í Malmø

05/16/2006 08:00 PM  –  Nalen í Stockholm

05/17/2006 08:00 PM  –  Stenhammersalen í Gøteborg

05/19/2006 08:00 PM  –  Amager Bio í Keypmannahavn

05/20/2006 08:00 PM  –  Skråen í Aalborg

05/25/2006 08:00 PM  –  Studenterhuset í Odense

05/26/2006 08:00 PM  –  Train í Århus

Mustang Sally á jóansøku

Andrew Strong er tiltikin góður á konsertum

Vit kunnu í dag avdúka, at Commitments sangarin Andrew Strong og danski bólkurin Carpark North spæla í Føroyum á jóansøku.

Vit kunnu í dag avdúka tvey av nøvnunum, ið spæla á Jóansøkufestivalinum. Talan verður um lívligan sól og blús tónleik við frálíka írska sangaranum Andrew Strong og danskan elektroniskan popprokk við Carpark North. Vit avdúkaðu longu fyrst í januar, at ein av føroysku festivalunum hevði Carpark North á skránni í ár, nú er tað váttað, at talan er um Jóansøkufestivalin. Jóansøkufestivalurin 2006 verður í Vági í døgunum 22. – 25. juni.

 

Tónleikurin er fólkaogn

Andrew Strong gjørdist heimskendur í filminum hjá Alan Parker The Commitments. Tann tá 17 ára gamli Strong spældi ómøguligi sangarin í írska sólbólkinum  The Commitments, ið stríddust fyri at gerast heimskend. Strong sang við síni frálíku rødd løg sum Mustang Sally og In The Midnight Hour so sannførandi, at sangirnir gjørdust fólkaogn, og Andrew Strong gjørdist stjørna.

 

Fleirfaldað platin

Síðan tá hevur Strong givið fleiri fløgur út sum solistur og luttikið á útgávum hjá øðrum. Fløgusølan hevur verið sera góð og fleiri platinplátur eru komnar á hyllina hjá Andrew Strong.  Hetta hevur havt við sær at Strong hevur spælt á konsertferðum við so stórum nøvnum sum Elton John, Prince, Lenny Kravitz og The Rolling Stones.

 

Mustang Sally í Vági

Í Oktober mánað í fjør gav Andrew Strong út eina Greatest Hits fløgu við øllum teimum stóru slagarunum, umframt at nýggir sangir eisini vóru á fløguni. Síðan fløgan kom út, hevur Andrew Strong verið á konsertferð, júst nú er hann í Austrialia. Men í juni gongur leiðin til Føroya, har Jóansøkufestivalurin leggur pall til hesa fráliku sangrøddina. So suðuroyingar og jóansøkugestir sleppa at skrála við til Mustang Sally og øll hini hittini, hjá Strong.

Danskur heimsklassi

Carpark North spældi næstan takið av Mentanarhúsinum í Fuglafirði í fjør

Í september mánað í fjør gjørdi danski rokkbólkurin Carpark North innrás í Føroyum, tá teir høvdu tvær konsertir í Mentanarhúsinum í Fuglafirði. Ummælarin hjá Sosialinum skrivaði soleiðis um tað fyrru konsertina í Fuglafirði: Carpark North fóru á pallin og spældu so sannførandi rokktónleik, at ongin ivi var um, at hetta er ein bólkur í heimsklassa. Teir forkelaðu okkum við sonnum oyrakrási. Hetta var snøgt sagt tann besta konsertin, sum hevur verið í Føroyum í langa tíð.

 

All things to All People
Carpark North sá dagsins ljós í Århus í 1999, tá teir tríggir Lau Højen (vokal, guitar m.m.), Søren Balsner (vokal, bas m.m.) og Morten Thorhauge (trommer, percussion, programmering) stovnaðu bólkin. Bólkurin fekk skjótt sítt gjøgnumbrot. Teirra fyrsta demofløga “Carstereo”,  kom út í 2001. Hetta er mest selda danska demofløga nakrantíð. Við fløguni “Carpark North”, sum kom út í 2003 fekk bólkurin sítt stóra gjøgnumbrot. Fløgan seldi út við 50.000 eintøk, og sangurin “Transparent and Glasslike” var mest spældi sangur í donsku útvarpsrásini P3.

Hetta árið vann bólkurin eisini fleiri virðislønir fyri bæði fløguna og sangin “Transparent and Glasslike”. Í apríl 2005 gav bólkurin út fløguna “All things to all People” og hevur bólkurin í hesum sambandi verið á konsertferð og spælt nógvastaðni, bæði í Norðurlondum og í Týsklandi, haðani bólkurin júst er afturkomin í vikuskiftinum.

Á jóansøku festivalinum fáa tey, sum enn ikki hava upplivað Carpark North á konsert, møguleikan at uppliva henda framúrskarandi konsertbólk.