Amnesty harmast um útsøgnina hjá Kaj Leo

Kaj Leo Holm Johannesen formaður sambandsfloksins boðaði frá, at hóast hann var ímóti deyðarevsing, hevði rættvísið sigrað í førinum Saddam Hussein. Forkvinnan í Føroya deildini hjá Amnesty International hevði ikki væntað tílíkar útsøgnir í einum landi sum okkara.

 

– Eg harmist um slík úttalilsi, tað má eg siga, sigur Annika Sølvará forkvinna í Føroya deildini hjá Amnesty International, um útsøgnina hjá formanni Sambandsflokksins Kaj Leo Johannesen, um at avrættingina av Saddam Hussein. Hon heldur fram:

– Tað er ikki talan um rættvísi at avrætta nakran, heldur ikki Saddam Hussein. Øll fólk hava krav uppá og rætt til eina rættvísa rættargongd, og fyri okkum er deyðarevsing ongantíð ein optión. Eg havi ikki hug til at viðmerkja ov nógv, um útsøgnina hjá Kaj Leo. Ikki annað enn at eg harmist um hetta, og at eg ikki hevði væntað tílík úttalilsi í einum landi sum okkara, har deyðarevsing ikki verður sæð sum ein møguleiki, sigur Annika Sølvará.

Hon gleðist samstundis um, at vit liva í einum landi, har politiska skipanin hevur valt ikki at góðtaka hetta sum revsimøguleika.

– Tað er gleðiligt at síggja, at man í eini komandi stjórnarskipan hevur valt, at lóggeva ímóti deyðarevsing og beinleiðis nevnir hetta í henni, sigur Annika Sølvará.

Hon heldur tvørturímóti tí, sum Kaj Leo sigur, at tað er ein ósigur fyri rættvísi at avrætta Saddam Hussein:

– Hetta at avrætta ein diktator ger, at man ikki fær gjørt upp við hansara misgerðir. Man fær ikki sett hann til svars fyri øll hini brotsverkini, sum hann hevur gjørt, og tey málini koma ongantíð fyri rættin. Harafturat verður hann nú pínslaváttur í Irak, og tað ger ikki støðuna betri., sigur Annika Sølvará at endans.

Guðrun og Guðrun gera um seg á heimsmarknaðinum

Gomlu stjørnumynstrini í nýggjari útgávu hava gjørt Guðruna og Guðruna til eitt sterkt brand, ið ger um seg í Tokyo, Milano og París, í síðstu viku gjørdu føroysku sniðini innrás í London.

 

Funky Faroe Islands

 

Guðrun Ludvíg, ið er kreativa helvtin av Guðruni og Guðruni, var væl nøgd við Funky Faroe Islands tiltakið, ið hon helt vera sera professionelt fyriskipað.

 

– Hetta eigur Annleyg á Menningarstovuni at fáa rós fyri, segði Guðrun og helt fram:

 

– Týsdagurin var góður, og eg fekk váttað, at vit eru á rættari leið. Tey við pallborðið prátaðu um at fáa sær ein partnara, ið tók sær av teimum pørtunum av virkseminum, sum ikki hevði við design at gera, og hetta er akkurát tað, sum eg og Guðrun gera. Hin Guðrun fer nú upp til at arbeiða fulla tíð við okkara virksemi.

 

Guðrun Ludvíg kom til Funky Faroe Island í London beinleiðis úr París, har hon hevði sýnt fram á Tranoi, ið er tann viktigasta messan á Paris Fashion Week. Fyri at sleppa við skal eitt upptøkupanel velja teg. Harafturat er messan sera dýr at luttaka á. Men fyri Guðrun og Guðrun er hetta eitt natúrligt stig.

 

– Tranoi er ein ordiliga góð messa við ordiligum flow yvir sær. Har koma teir heilt røttu keypararnir, og tað er týdningarmikið hjá okkum at vísa andlit, greiður Guðrun frá.

 

Guðrun og Guðrun er vorðið eitt sterkt brand, og heimsmarknaðurin er komin við. Hetta sást til dømis í nýggjastu italsku útgávuni av Vogue, har sniðini hjá Guðruni og Guðruni verða víst fram. Hetta er eitt sera týdningarmikið blað, sum altíð er útselt og týdningurin av at verða víst fram í hesum blaðið, eigur ikki at undirmetast.

 

– Eg var sjálv í Milano í sambandi við hetta, og tað er øgiliga stuttligt, at sleppa við í eitt sovorðið blað, sigur Guðrun.

 

Størsti marknaðurin hjá Guðruni og Guðruni er í Japan. Tey stóru mótahúsini í Japan hava tikið Guðrun og Guðrun til sín og eru imponeraði av at Føroyar finnast og yvir, at vørurnar allar eru hondbundnar.

 

– Vit hava í løtuni 12 bindikonur, men hava trupult við at fylgja við eftirspurninginum. Tað krevst nógv av bindikonunum, tær skulu allar binda líka, og duga at halda deadline. Tær eru sera týdningarmiklar fyri okkum og eiga ikki at verða gloymdar, sigur Guðrun.

 

Á mótasýningini í London vístu Guðrun og Guðrun fram eitt bland av summar- og vetrarvørum.

 

– Hetta var fyri at vísa okkara bílæt – hvat tað er sum vit hava at bjóða. Men okkara sterkasta síða er vetur. Vit arbeiða við tí løttu fløtu bindingini. Míni snið byggja á tey gomlu føroysku mynstrini. Eg taki gamla stjørnumynstrið og geri eina nýggja dagførda útgávu av tí, og hetta vekir ans uttanlands. Á Tranoi messuni í París var nógv diskussión um stjørnutroyggjurnar, greiðir Guðrun frá.

 

Føroyski marknaðurin er spakuliga eisini komin við, og hetta gleðir Guðruna.

 

– Í byrjanini, tyktist fólk at hugsa, hatta kunnu vit binda sjálvi, og tí vildu tey ikki keypa okkara troyggjur. Men hetta er broytt eitt sindur. Eg upplivdi tildømis, at ein kona og dóttur hennara komu inn og keyptu eina stjørnutroyggju. Mamman hevði boðið dóttrini, at hon kundi binda henni troyggjuna, men dótturin vildi hava eina originala Guðrun og Guðrun troyggju. Tá hugsaði eg YES!

 

– Vit mangla altíð dugnaligar bindikonur og við vaksandi eftirspurninginum mugu fleiri koma til. Vit hava roynt at tosa við skúlarnar um at fáa binding inn aftur í skúlagongdina, soleiðis at hetta handverkið ikki dettur niður fyri, sigur Guðrun.

Hetta er stórt fyri meg!

Jóhanna av Steinum í samrøðu við Wendy Scott

Jóhanna av Steinum sleppur ikki inn á London Fashion Week sum áskoðari, so tá onkur sigur, at hon kundi sýnt fram har, er hon sannførd um, at betri kompliment kundi hon ikki fingið.

 

Funky Faroe Islands

 

Jóhanna av Steinum var nógv minst viðurkenda navnið av føroysku sniðgevunum, ið sýndu fram á Funky Faroe Islands. Hóast hetta vóru nøkur av sniðunum hjá Jóhannu av mótatíðindakvinnuni Wendy Scott tikin fram sum verandi millum tey bestu hendan dagin, og hon helt at okkurt av teimum kundi farið beint á London Fashion Week.

 

– Tað er ótrúligt, at fólk, sum hevur skil á tí, sigur sovorðið, sigur Jóhanna sjónliga væl nøgd.

 

– Vanliga sleppa fólk sum eg, slettis ikki framat hesum fólkum. Eg sleppi til dømis ikki inn á London Fashion Week sum áskoðari, og tá ein kvinna sum Wendy Scott sigur, at eg kundi sýnt fram har, so er tað ordiliga gott. Eg haldi ikki eg kann fáa betri kompliment. Vanliga fær man ikki feedback uppá síni design, so hetta er stórt fyri meg, greiðir Jóhanna frá.

 

Á Funky Faroe Islands valdi Jóhanna at sýna fram ymiskt, ið hon hevur arbeitt við seinastu tíðina. Hon var ikki heilt greið yvir, hvussu heildin fór at rigga saman, og snýkti seg tí inn á skúlan tað eina kvøldið, har  lat hon ginir í klæðini og lukkutíð riggaði alt saman.

 

– Eg havi ein nokkso kommersiellan stíl. Fólk skal kunna vera í klæðunum, sum eg geri. Alt er bundið, so nógv arbeiði er av tí, so tí vil eg sleppa av við tað, sum eg geri, greiður Jóhanna frá.

 

Umleið helvtin av klæðunum, ið Jóhanna sýndi fram í London var bundin við hond, hin helvtin við maskinu.

 

– Eg vil vil gjarna brúka binding til okkurt annað enn vetrartroyggjur, gera okkurt, sum er eitt sindur  meira elegant.

 

Jóhanna lesur á St. Martins sniðgevanar skúlanum og er júst byrja á síðsta árið har. Hon hevur grundútbúgving av London College Of Fashion. Í næstum ferð hon undir kollektiónina, ið er hennara síðsta verkætlan á skúlanum, um henda kollektíon er nóg góð, so sleppur hon við á eina mótasýning, nakað ið Jóhanna vónar. Síðan skal avgerast, hvat hon víðari ger.

 

Hon heldur, at Funky Faroe Islands er eitt sera væleydnað tiltak.

 

– Eg fekk eitt sindur burtur úr, eg kendi øll støðini og fólkið, ið tey tosaðu um við pallborðið. Serliga áhugavert var at hitta Hilary Riva (ið er forkvinna í British Fashion Council og høvuðsfyriskipari av London Fashion Week), og hoyra “first hand” hvussu tú gert, sigur Jóhanna.

 

Hon heldur ráðstevnuna vera eitt sera jaligt átak, og gott er at onkur setur fokus á okkurt annað enn t.d. fótbólt heldur hon, stutt sagt metur hon, hetta vera eitt fantastiskt tiltak.

Hetta er so forbiðið gott!

– Funky Faroe Islands hevur givið okkum beinleiðis atgongd inn í enska mótaheimin, ein hurð er blivin sparka inn, og hetta verður ikki gloymt, sigur Barbara í Gongini, ið stóð fyri villasta innslagnum á Funky Faroe Islands.

 

Funky Faroe Islands

 

Barbara í Gongini kom til London at luttaka á Funky Faroe Islands, beinleiðis úr París, har hon hevði sýnt fram á Zipzone Gallery beint undir Eiffel torninum. Har sýndi Barbara fram saman við nøkrum av teimum meira progressivu nøvnunum á heimsins størstu mótaviku. M.a. dananum Jens Laugesen, ið fekk heiðursløn frá fronsku delegatiónini, sum týdningarmiklasti sniðgevi á á mótavikuni.

 

– Eg arbeiðið við eini smalari linju til ein smalan málbólk, sigur Barbara um sniðini, ið hon sýndi fram bæði í París og London og heldur fram:

 

– Mítt vørumerki er at binda og flætta ymisk tekstilir saman, og at brúka rættiliga heftiga styling. Hetta sást millum annað á stóru og villu hárstýlingini við eitt nú balónum og pútum í hárunum á modellunum.

 

Barbara heldur ikki, at tær nýtist at kategorisera móta í millum brúkbarheit og list, eins og onkur róði fram ímóti á pallborðsfundinum.

 

Barbara sigur tó, at hennara áhugi liggur ikki í at vinna nógvan pening upp á síni snið:

 

– Eg vil tilføra okkurt nýtt til mótan, og lagið meg ikki eftir marknaðarkreftunum, sigur hon.

 

Barbara ferðast í yvirhálingarbreytini, og er uppi ímóti teimum stóru sniðgevunum, hetta skapar virðing fyri hennara arbeiði, men teir stóru eru fíggjarliga sterkir, og kunnu lætt útkonkurera hana. Tí tekur hon eina sesong í senn.

 

– Kann lítla eg koma og gera meg galdandi? Her er talan um at vita, hvussu lítil tú kanst vera og hvussu stórar søgur tú kanst fortelja, hetta krevur raffiniment, greiður Barbara frá.

 

Hon er sera væl nøgd við tiltakið, ið menningarstovan hevur skipað fyri í London.

 

– Hetta er so forbiðið gott! Vit designarar hava ikki miðlar til at skipa fyri tílíkum tiltøkum. Funky Faroe Islands hevur givið okkum beinleiðis atgongd inn í enska mótaheimin, ein hurð er blivin sparka inn, og hetta verður ikki gloymt, sigur Barbara í Gongini um tiltakið.

Ein fatalur brølari at gevast við Prixnum

Við Teiti og Eivør er fokus byrjað at verða sett á føroyskan tónleik í altjóða høpi, ella í øllum førum í Íslandi og Danmark, og eg merki á mínum starvsfeløgunum, at teir eru byrjaðir at tosa um, hvat tað er, ið hendur har uppi, tí er hetta eitt sera óheppið tíðspunkt, at lata besta sýnisgluggan hjá føroyskum tónleiki aftur, sigur danski plátufelagstjórin Jens Ove Friis.

Jens Ove Friis er stjóri í plátufelagnum RecArt Music. Hann hevur síðan Prix Føroyar finaluna í 1999 vitjað sum dómari, og hann sigur, at sjálvt um fyrireikararnir ikki høvdu bjóðað honum sum dómara til eitt komandi Prix, so hevði hann álíkavæl farið til Føroyar í sambandi við prixið og um hann so skuldið goldið fyri at sloppið inn.

 

Ein gluggi til føroyska tónleikalívið
– Fyri okkum uttanlands er Prix Føroyar ein gluggi inn til føroyska tónleikalívið. Vit fáa á ein lættan hátt yvirblikk yvir tað, ið hendur á føroyska tónleikapallinum. Hetta er gull vert fyri okkum. Tí hevði eg veruliga verið keddur, um Prix Føroyar gavst, og hetta hevði verið ein stórur missur fyri føroyska tónleikalívið, sigur Jens Ove Friis.

 

– Eg havi vitjað ymisk onnur tiltøk í Føroyum, eitt nú G!Festivalin. Men hesi tiltøk geva okkum ikki somu mynd av tí nýggja og spennandi, sum prixið gevur. Á festivalunum er meira talan um tey, ið longu eru sprottin. Ein festivalur kann ikki á sama hátt vísa okkum tað, sum vit í ídnaðinum leita eftir. Tit skulu heldur ikki gloyma, at Prix Føroyar er kanska týdningarmesti liðurin í føðiketuni hjá festivalunum og at kuta hendan burtur hevði verið ein fatalur brølari, fyri føroyska tónleikalívið, sigur Jens Ove Friis og heldur fram:

 

Burturvið at gevast júst nú
– Eg síggi Prix Føroyar sum eina messu, eitt sindur á sama hátt sum Spot Festivalurin í Århus. Eitt stað har framtíðin og nýggjasti parturin av nútíðin verður sýndur fram, og hetta er tað, ið er áhugavert fyri tónleikavinnuna.

 

– Tað hevði eisini verið ómetaliga ergriligt, um man valdi at gevast júst nú. Við Teiti og Eivør er fokus byrja at verða sett á føroyskan tónleik í altjóða høpi, ella í øllum førum í Íslandi og Danmark, og eg merki á mínum starvsfeløgunum, at teir eru byrjaðir at tosa um, hvat tað er, ið hendur har uppi. Vit upplivdu tað sama í Danmark við Aqua, uttan nakra samanbering annars. Tá tey gjørdust heimskend, byrjaði umheimurin at geva donskum tónleiki ans. Her er Prix Føroyar heilt rætti sýnisgluggin, og tað tykist tí burturvið at lata hann aftur nú, sigur Jens Ove Friis.

 

Prixið er vorðið professionellari
Jens Ove Friis er annars væl nøgdur við tær broytingarnar, ið Prix Føroyar hevur verið ígjøgnum síðan 1999.

 

– Eg haldi, at Prix Føroyar er farið frá at vera ein hugnalig eitt sindur bygdakend føroysk kapping til eitt show, ið hevur altjóða dám. Sjálvandi eru tað ting, ið kundu verið broytt. Eftir AME seinast bað Fróði okkum, ið vóru gestir um at senda honum viðmerkingar. Eg sendi honum ein langan mail við hugskotum. M.a haldi eg, at man í nógv størri mun, átti at tikið býarlívið í Havnini við í tiltakið. Tá man hevur savnað so nógvar útlendingar í Føroyum, átti man at nýtt høvið til at vísa nøkur onnur nøvn fram. Eitt nú bólkar, ið eru vrakaðir í innleiðandi umførum, teir kunnu í veruleikanum vera júst tað, ið vit leita eftir. Her áttu tildømis pallpassini hjá útlendsku gestunum givið atgongd til tónleikatiltøk kring allan býin. Soleiðis at AME umfataði alla Havnina alt vikuskiftið, greiður Jens Ove Friis frá.

 

Sjálvt AME tiltakið helt Jens Ove Friis annars rigga sera væl, tí fyri hann hevur kappingarelemtið ongantíð verið tað týdningarmiklasta.

 

– Kappingin hevur skapt ein ávísan spenning, og er gott fyri áskoðararnir, men tað er ikki tað týdningarmiklasta fyri okkum, ið vilja hava eina mynd av hvussu føroyski tónleikapallurin sær út, greiður hann frá.

 

Kanska bert ein samandrátt
– Viðvíkjandi sjónvarpinum, so dugi eg at síggja, at núverandi leistur kann vera ein trupulleiki, sjónvarp er fiktión og er ikki altíð líka væl egnað til at vísa veruleikan. Kanska skuldi sjónvarpið ístaðin fyri at senda alt beinleiðis, sent ein samandrátt kvøldið eftir, við einum lagi við hvørjum bólki, sigur Jens Ove Friis.

 

Prix Føroyar er ein orsøk til at fara til Føroyar
At enda spurdu vit Jens Ove Friis, hvørt hann kundi ímynda sær, um hann hevði valt at fari til onnur tiltø fyri at hildið á við at hava innlit í føroyskan tónleik, um Prix Føroyar varð tikið av skránni.

 

– Ja, í ein ávísan mun, men eg hevði ikki farið upp bara til ein festival ella okkurt tílíkt. So skuldi tað passað saman við onkrum øðrum eisini. Festivalar og annað líkjast nógv tí, ið vit síggja í Danmark, og kunnu ikki á sama hátt geva mær yvirblikkið, so tí eru teir ikki á sama hátt sum Prix Føroyar ein orsøk at fara til Føroyar.

Prix Føroyar er trupult at avloysa

Fyriskiparin av Nibe Festivalinum hevur seinnu árini havt nógvar føroyskar bólkar á skránni, og hann er ikki í iva, um stóra týdningin, ið Prix Føroyar hevur fyri marknaðarføring.

 

Eg haldi, at tað hevði verið øgiliga syrgiligt, um fyrireikararnir góvust við at skipa fyri Prix Føroyum, sigur Peter Møller Madsen, ið seinastu tríggjar Prix Føroyar finalurnar hevur umboðað Nibe Festivalin í Føroyum. Nibe Festivalurin er tann festivalurin, ið hevur havt flest føroyskar bólkar á skránni seinastu árini, líka síðan framførsluna hjá Clickhaze í 2001. Ein framførsla, ið royndi festivalfyriskiparin metur vera eina av størstu tónleikaupplivingunum, ið hann nakrantíð hevur havt.

 

– Hetta er eisini, ein tann framførslan, ið eg havi fingið flest jaligar afturmeldingar fyri, sigur Peter Møller Madsen í prátinum, ið vit gjørdu við roynda fyriskiparan, áðrenn tað var endaliga staðfest, at Prix Føroyar var avlýst.

 

Føroysku bólkarnir hava uppiborið luttøkuna
Síðan Prix Føroyar finaluni 2001, hevur Peter Møller Madsen havt eitt serligt forhold til føroyskan tónleik, og hetta er komið bólkum sum Gestir, Eivør, Høgna Lisberg, Brandi Enni og Messell til góðar. Men Peter Møller Madsen leggur dent á, at eingin føroyskur bólkur er komin á skránna uttan at hava uppiborið tað.

 

– Allir møguligir bólkar bæði danskir og útlendskir vilja fegin luttaka á festivalinum, so eg vænti ikki, at eg hevði havt lagt merki til føroyskan tónleik, hevði eg ikki havt verið til Prix Føroyar finaluna í 2001. Sjálvandi hevði eg ivaleyst havt hoyrt, um Teitur, tí hann er eisini eitt navn her í Danmark, men tað skerst heldur ikki burtur, at fyrstu ferð eg sá Teitur spæla var á Prix Føroyar finaluni í 2001, sigur Peter Møller Madsen.

 

Sera gjøgnumført og professionelt
– Tær tríggjar Prix Føroyar finalurnar, ið eg havi verið til, hava veruliga gjørt djúpt inntrykk á meg. Eg tosi nógv um Prix Føroyar í Danmark. Fyrst og fremst tí her er talan um eitt konsept, sum heldur. Prix Føroyar er sera gjøgnumført og professionelt fyriskipað. Tað er ikki bara eg, sum haldi tað, tað haldi eg, at alt danska ferðalagið tykist samt um, sigur hann og heldur fram:

 

– Vit hava havt nógvar rokkkappingar í Danmark, ið eru komnar og farnar – Men eingin hevur varað við. Her haldi eg, at Prix Føroyar er munandi betri fyriskipað. Fyriskipararnir hava veruliga rós uppiborið, tiltakið er veruliga flott.

 

Ein fantastisk søga
Peter Møller Madsen vísir á, at tað er sera torført at avloysa Prix Føroyar og tann týdning, ið Prix Føroyar hevur  fyri føroyskan tónleik.

 

– Um man veruliga vil út at fortelja hesa fantastisku søguna um tí høgu góðskuna, ið føroyskur tónleikur hevur, so er tað ikki nóg mikið at fara á messur, senda teldubrøv og pressutilfar. Hetta gera so nógv onnur. Har er Prix Føroyar eitt dømi um eina nógv betur tilgongd. Tú tekur fólk við á staðið, og vísir teimum tónleikin í praksis, tað fært tú ikki gjørt betur enn við Prix Føroyum.

 

Ikki sannførdur av AME
Peter Møller Madsen vitjaði á Prix Føroyar finaluni í 2001, 2003 og 2005, hann er tó ikki sannførdur um, at leisturin, ið varð valdur á AME tiltakinum í 2005 var tann heilt rætti.

– Hesin leisturin klæddi ikki Prix Føroyar so væl. At einans hava tríggjar Prix bólkar í finaluni er ikki nóg mikið, antin gerst tað ov einstátta ella ov skizofrent, ið fjør gjørdist tað t.d. eitt sindur ov nógv ein blúskonsert. Mær dámdi væl tónleikin, men Prix Føroyar datt eitt sindur á gólvið, sigur Petur Møller Madsen og heldur fram

 

– Annars er hugskotið við at hava teir bestu bólkarnar við fyri at krydda finaluna ikki heilt burturvið, t.d. kundu hesir spælt í millum Prix Føroyar finalistarnar, ið áttu at verið eini 6 í tali, soleiðis fingu miðlarnir og útlendsku gestirnir eisini uppliva teir, sigur Peter Møller Madsen.

 

Hann greiðir frá, at hann øll árini eisini hevur verið tikin á bóli av hvussu væl framleidd sjónvarpssendingin hevur verið, støðið hevur verið sera høgt.

 

Fáa tey røttu fólkini til Føroyar
– Nú veit eg ikki, um fíggjarlig atlit eru orsøkin til, at fyrireikararnir nú hugsa um at sleppa Prix Føroyum, men hetta hevði verið synd, sigur Peter Møller Madsen.

 

– Sjálvt um eitt tiltak ikki ber seg her og nú, so mugu vit eisini hugsa í framtíðar prognosum. Miðlarnir eru jú nógv uppi í Prix Føroyar tiltakinum, og teir hava eina skyldu, at bera nýggja mentan fram fyri hyggjarum og lurtarum sínum. Eg trúgvi eisini, at hetta er við til at geva teimum nýggjar hyggjarar, lurtarar og lesarar, sigur Peter Møller Madsen. Hann heldur eisini, at til hevði borðið at gjørt tiltakið eitt sindur bíligari, uttan at tað fór fyri skeytið.

 

– Eitt dømið er útlendsku gestirnir, við at gera útveljanina av hesum eitt sindur meira málrættaða, soleiðis, at tú fekst tey heilt røttu fólkini til Føroyar. Kanska havt eitt sindur færri, og so latið tey, ið vitja verið fólk sum veruliga vildu vera við til hetta, sigur hann.

 

Fyriskiparin av Nibe Festivalinum er als ikki í iva um, hvør besta Prix Føroyar finalan, ið hann hevur vitjað, var.

 

Hevði bookað eitt endurstovnað Clickhaze
– 2001 hevur eitt heilt serligt pláss hjá mær. Hetta var fyrsta árið, eg var í Føroyum. Kvøldið fyri finaluna var ein pallborðsfundur í Útvarpshøllini. Har vóru útlendingar í tónleikaídnaðinum í pallborðinum, og nógvir tónleikarar og onnur áhugaði vóru komin saman, tá var ein av spurningunum til pallborðið, hvussu føroyskur tónleikur kundi koma víðari. Svarið var, “finn tykkum eina nýggja Bjørk!” Kvøldið eftir upplivdu vit so eina nýggja Bjørk í Clickhaze, greiðir Peter Møller Madsen frá og heldur fram

 

–  Tað er eingin ivi um, at varð Clickhaze endurstovnaður, hevði eg booka tey uttan at blunka.

 

Hann heldur somuleiðis, at Týr var ein stór uppliving hetta árið.

 

– Hetta var fyrstu ferð eg vitjaði, og tað er lætt at ímynda sær, at var góðskan ikki so høg, so hevði eg neyvan komið aftur. Tað er sjálvandi deiligt at vitja eitt land sum Føroyar, men vit noyðast at kunna forsvara fyri okkum sjálvi at brúka tíð til tílík tiltøk, og í førinum Prix Føroyar kunnu vit altíð forsvara at luttaka., sigur Peter Møller Madsen at enda.

 

– Fløgan kemur tá vit eru heilt nøgd við alt

Væntandi kemur nýggja fløgan við Lenu í oktober, men Lena, Niclas og ljóðblandarin Ryan Hewitt lata hana ikki úr hondum fyrr enn tey øll eru heilt nøgd við alt.

 

Í hesum døgum eru Lena og Niclas í Vancouver, har Lena spælir konsert í The Media Club í kvøld. Tey eru komin til Vancouver úr Los Angeles, har tey í síðstu viku ljóðblandaðu komandi fløguna saman við heimskenda ljóðblandaranum Ryan Hewitt.

 

Ryan Hewitt er ein av heimsins mest eftirspurdu ljóðblandarum, hetta tí hann var ein av monnunum, ið hevur ljóðblandað Stadium Arcadium hjá Red Hot Chili Peppers, ið er ein av best seljandi fløgunum hetta summarið. Hewitt hevur ljóðblanda 15 av teimum 28 løgunum á fløguni, ið er framleidd av einum av heimsins allarbestu framleiðarum Rick Rubin.

 

Lena segði herfyri við planet.fo, at teimum dámdi væl ljóðið á Stadium Arcadium, og tí settu tey seg í samband við umboðsmannin hjá Hewitt. Prísurin var tó alt ov høgur, so tey máttu sleppa hesum ætlanunum. Men nakrar dagar seinni setti umboðsmaðurin seg aftur í samband við Lenu.  Tí eftir at hava hoyrt upptøkur við Lenu, hevði Hewitt sjálvur avgjørt, at hann vildi sleppa at arbeiða við songkvinnuni.

 

Niclas greiður frá, at tað hevur gingið væl at ljóðblanda saman við Ryan Hewitt.

 

– Ryan er sum vera man kompetentur og sera fittur fýrur, sigur Niclas.

 

Enn er tó ikki liðugt ljóðblandað. Tey hava fingið eitt ljóðbland at lurta eftir, síðan vera broytingar og ymiskir leysir endar gjørdir síðst í september.

 

– Upprunaliga ætlaðu vit at vera liðug nú. Men hóast vit vilja gera alt fyri at fáa fløguna út í oktober, so verður onki gjørt fyrr enn vit eru heilt nøgd við alt. Tað eru vit øll trý samd um. So ymsar broytingar vera á skránni, tá Ryan ljóðblandar liðugt síðstu vikuna í september, sigur Niclas.

 

Í løtuni arbeiðir Ryan Hewitt við John Frusciante gittarleikara í Red Hot Chili Peppers, men fer síðan aftur í gongd við útgávuna hjá Lenu.

 

Meðan Lena og Niclas hava verið í Los Angeles hevur Lena spælt tvær konsertir. Tann fyrra var á Live At The Lounge fríggjakvøldið 18. august. Hetta kvøldið spældi Lena einans tvey løg. Umframt hana spældu fimm onnur tónlistarfólk og tveir stand up skemtarir luttóku. Ein teirra var Michael Richards, ið ivaleyst er best kendur úr sjónvarpsrøðini Seinfeld, har hann spælir løgni grannin hjá Seinfeld, Cosmo Kramer.

 

Konsertin hjá Lenu gekk væl, og hon var sera væl móttikin, greiðir Niclas frá.

 

– Fleiri fólk frá hesi konsertini møttu upp til tað seinna giggið týskvøldið í Genghis Cohen at lurta eftir Lenu – teirra millum tveir av teimum luttakandi artistunum frá fríggjakvøldinum, sigur Niclas.

 

Hetta er fyrstu ferð, at Lena hevur spælt konsert í Los Angeles. Tí nýttu eisini fleiri fólk úr tónleikaídnaðinum høvið at hoyra Lenu á konsertini týskvøldið.

 

Lena verður skjótt aftur í Evropa, hon spælir eina konsert í Musikteateret í Skive í Danmark mánakvøldið 11. september og mikudagin 13.  í Café Kino í Keypmannahavn.

Heimsins bestu sjónleikarar

Beinta Clothier er ein av teimum fáu ungu kvinnunum, ið leitar sær útbúgving innan sjónleik. Vit hava spurt Beintu, hvørjar leikarar hon metir vera teir bestu.

 

Beinta Clothier gongur á sjónleikarskúla í Odense. Hon er í hesum døgum farin undir síðsta árið á skúlanum. Beinta er ein av teimum fáu ungu kvinnunum, ið fáa sær útbúgving innan hesa listagrein.

 

Beinta hevur verið nógv at sæð á føroyska sjónleikarpallinum. Vit hava upplivað hana í leikum sum Pippi, Pinocchio, Skeyk, Renn fyri vívinum, Einki er sum mammusa gras, Leikhúsjólum, umframt í útisjónleikum á ólavsøku.

 

Beinta hevur umframt hesar leikir spælt við í fleiri leikum í Danmark.

 

Vit hava spurt dámligu ungu sjónleikarkvinnuna, um hvørjar fimm sjónleikarar, hon metir vera teir bestu í heiminum. Hon hevur valt leikarar, ið fevna víða, her eru yngri sum eldri, menn sum kvinnur og skemtileikarar sum álvarsamari leikarar.

 

Johnny Depp
Eg haldi Johnny Depp bara blívur betri og betri. Hann hevur evni til at umskapað seg til alt. Eg minnist, at eg sá hann í “Finding Neverland”. Tað er ein av bestu filmunum eg havi sæð í longri tíð.

 

Dawn French
Komiska timingin hjá Dawn French er heilt fantastisk. Hon kann gera teir mest absurdu figurarnar, men samstundis eru teir so gjøgnumførdir, at teir

aldrin verða for nógv av tí góða.

 

Gareth Armstrong
Eg sá Gareth Armstrong spæla ein einmansleik í New York, hann hevði evni til at bergtaka fólk. Hansara máti at bera fram eina søgu, havi eg

ikki sæð áður.

 

Julianne Moore
Eg sá Julianne Moore í “The Hours”. Eg græt hvørja ferð eg sá hana. Tann mátin hon gjørdi ein so kompleksan figur so einfaldan, yvirraskar meg enn.

 

Jeremy Irons
Tá eg hyggi eftir filmum, ið Jeremy Irons er við í, tiltalar hansara ró meg so nógv. Og so hevur hann heimsins bestu rødd, sum sigur meir, enn tey orð, ið hann sigur.

Magni bjargaði Summarfestivalinum

Fyri at útlendsku nøvnini skuldu sleppa á pall á Vágsbøi í sunnunáttina, sendi Atlantic Airways flogfar til Kastrup eftir teimum.

Summarfestivalurin

 

Klokkan var farin av tvey sunnunáttina, tá Johnny Deluxe endiliga fór á pallin á Summarfestivalinum. Men enn var stúgvandi fult av fólki á Vágsbøi. Men tað var bert við stórari vælvild frá Atlantic Airways, at gestirnir á Summarfestivalinum upplivdu hetta hæddarpunktið á festivalinum.

 

Vitandi um, at Shu-Bi-Dua, Johnny Deluxe og David Phelps sótu á flogvøllinum í Kastrup, meðan útvið 10.000 fólk bíðaðu eftir teimum í Klaksvík, tók Atlantic Airways eini óvanlig stig.

 

Eitt av flogførum felagsins stóð í Basel, har tað júst hevði fingið nýggjan motor. Ætlanin var, at flogfarið skuldi flúgva til beint Føroyar, tá líkindi vóru. Men ístaðin varð flogfarið sent til Danmarkar, eftir tónleikarunum, og øðrum viðskiftafólki. Magni Arge stjóri greiður frá.

 

– Vit gjørdu okkara besta! Við at taka hetta flogfarið inn, kundu vit spara 2 tímar. So vit sendu tað til Danmarkar eftir bólkunum og fyltu tað so upp við ferðafólki. So vónaðu vit, at tað fór at sleppa at seta seg í Vágum, og tað eydnaðist. Eg haldi bara, at tað er harmiligt, at Shu-Bi-Dua ikki kom við.

 

Shu-Bi-Dua valdi ikki at koma við flogfarinum, tí at sangarin sambært bólkinum var vorðin sjúkur, beint áðrenn farast skuldi umborð

 

– Tá flogfarið kom í Vágarnar vóru ikki líkindi at lenda. Hesa løtuna flugu trý flogfør uppi yvir, og hóast tað var vorðið klárt á Sørvágsfirði, lá ein hattur av mjørka yvir flogvøllinum, og líkindi vóru tí ikki at lenda. Flogførini vóru øll trý um at røkka markið við brennievni, soleiðis at tey máttu fara avstað aftur -Men so klárnaði tað knappiliga  í. Løtu seinni stóðu øll trý flogfør á vøllinum, sigur Magni Arge.

 

Hann gleðist um, at tey kundu hjálpa Summarfestivalinum og hinum sum komu við hendan túrin. Hann vísir á, at hetta eydnaðist orsaka av stórari vælvild frá starvsfólkinum hjá Atlantic Airways, og hann sigur, at hann kendi veruliga á starvsfólkinum, at tey vildu hjálpa, so at hetta skuldi eydnast.

 

– Roger Hodgson hevði flogið 36 tímar, áðrenn hann lendi í Vágum, og tá vóru bert fáir tímar til, hann skuldi avstað aftur, og tí varð tyrlumanningin kallað til arbeiðis, og Hodgson varð flogin úr Vágum til Klaksvíkar.

 

Magni Arge sigur, at hann er glaður um, at hetta eydnaðist, men sigur seg tó vera harman um, at hann sjálvur ikki fekk verið á festivalinum, men mátti vera á flogvøllinum allan dagin.

PUNKA FØROYSKA SANGSKATTIN

Punk trio’in The Dreams leggur í morgin síðstu hond á upptøkurnar av fyrstu fløguni hjá bólkinum. Fløgan punkar føroyska sangskattin og fær Grønu Sangbók at ljóða, sum hon ongantíð hevur ljóðað áður.

 

Seinastu báðar vikurnar hevur The Dreams tikið fløgu upp í Studio Pegasus í Klaksvík. Hetta kann gerast bæði fyrsta og síðsta fløga, ið bólkurin ger til føroyska marknaðin. Tveir av limunum eru longu fluttir til Danmarkar, meðan tann triði flytur niður í næstum. Síðan The Dreams skiftu navnið Zink út, og endaðu í favninum hjá amerikansku songkvinnuni Anastaciu, hevur næstan alt tos um The Dreams snúð seg um bólkin og útlandið. Men nýggja fløgan snýr seg bara um føroyska heimamarknaðin.

 

Føroyskir slagarar

The Dreams hevur hesar seinastu vikurnar tikið 10 løg upp, tey flestu av hesum eru sannir slagarar. Hettar eru løg sum Til allar vinir hjá Blátt, 80’ini hjá Frændum, Sirkús Tinganes hjá Annfinn & Co., Sasa sa sa hjá Georg eystan Á, Forelskaður sjónleikari hjá Páll Finnur Páll, Eg siti so eina hjá Vestmonnum og Nummar hjá Terja Rasmussen. Teir tolka eisini Nalju klassikaran “Sjeikurin”, ið Poppkorn eisini tolkaðu herfyri. Men Eirikur Gilston Corfitz Andersen bassleikari í The Dreams lovar, at teirra útgáva verður nógv betur, og flennur. Hann sigur, at teir eru øgiliga væl nøgdir við úrslitið. Tað hevur riggað væl, at gjørt løgini um til Popppunk. Í stíl minnur fløgan um eitt nú Green Day, Blink 182 og Sum 41, sigur hann. “Vit hava spælt popppunk í 4-5 ár nú, so tað liggur heilt nátúrligt hjá okkum, at spæla løgini í okkara stíli”, sigur hann.

 

Gomul ætlan

Í MTV sendingini A Cut, tulkaðu The Dreams eitt lag hjá Anastaciu, og nærliggjandi er tí at spyrja, um henda tulkingin gav teimum hugskotið til hesa fløguna. Men tað gjørdi hon ikki, sigur Eirikur. Hann greiðir frá, at hugskotið er gamalt. Tá teir itu Zink  spældu teir einaferð “Forelskaður sjónleikai” í eini punk útgávu, tað var stuttligt. Tì hava teir spælt við tankan um eina tílíka útgávu leingi.
Teir dáma allir væl bólkin Me First And The Gimme Gimmies, ið er ein bólkur, ið  tolkar kend løg í punk útgávum. Bólkurin hevur limir út NOFX, Foo Fighters og Lagwagon og hevur givið fleiri útgávur út. So huskotið kemur kanska frá teimum, sigur Eirikur, ið tó viðgongur, á at teir als ikki gera líka ráðar útgávur av løgunum sum Gimme Gimmes – Vit spæla popppunk, sigur hann.

 

Leitaðu í Grønu Sangbók

Tað eru teir í The Dreams, ið sjálvir hava valt løgini. Hetta varð m.a. gjørt við at blaða í Grønu Sangbók greiðir Eirikur frá. Nógv av løgunum, ið teimum dámdu høvdu fimm vers og einki niðurlag, so tey vórðu droppaði. Eftir sótu teir so at endans við 10 løgum, ið eru tey, ið vera á fløguni.

Løgini eru flest øll kend, og á onkran hátt vorðin fólkaogn. Men ein jokari er eisini við. Hetta er lagið “Nú ert tú ein onnur” hjá Eyðun Nolsøe av fløguni Eyðun og Terji. Lagið gjørdist ongantíð eitt stórt hitt, men sambært The Dreams hevur tað stórt hittpotentiali, og riggar væl í popppunk útgávu.

 

Ringt at meta um yndisløg

Eirikur sigur, at hann heldur, tað vera ringt at meta um, hvørji løg eru tey bestu á fløguni. Men hann er persónliga serliga væl nøgdur við Til allar vinir og 80’ini, ið hann heldur rigga øgiliga væl.

Kemur út 1. mei

Tað er ljóðtøkningurin Ingi Isaksen, ið hevur snarað knøttunum saman við teimum í The Dreams í upptøkuhølunum hjá Pegasus í Klaksvík. Fløgan verður nú ljóðblandað í Kristoff Studio inni á Gøtu í Hoyvík av Kristoffur Mørkøre. Fløguhúsan ger Heiðrikur av Heygum. 3’arin stendur fyri útgávuni. Væntandi verður fløgan í handlunum 1. mei.

 

Útlandið bíðar

Í síðstu viku varð almannakunngjørt, at The Dreams fer at spæla á Spot-festivalinum í Århus fyrsta vikuskiftið í juni. Men hetta er bert ein av fleiri konsertum við The Dreams í Danmark. Í løtuni verður arbeitt við konsertum saman við tveimum donskum bólkum.