Steintór Rasmussen

Vindurin spilti veitsluna

Leygardagurin á Summar Festivalinum skuldi eftir æltan verið ein stór veitsla við nøkrum av teimum allar bestu føroysku tónleikanøvnum og stórum útlendskum nøvnum sum Kim Wilde, Bryan Rice og Amy Diamond. Men áðrenn veitslan veruliga kom í gongd gjørdist vindurin so ógvisligur, at festivalurin avlýsti endabrakið.

Amy Diamond gjørdist síðsta navn, ið spældi á metstóra pallinum á Vágsbøi. Tá unga norska poppstjørnan fór av pallinum, varð avgerð tikin um, at vindurin var ov nógvur at halda fram. Vindurin lá beint inn í pallin. Hóast talan var um ein stóran og tungan pall, virkaði dúkurin sum eitt segl. Tí varð mett, at trygt var ikki at halda fram.

Meðan Petur Háberg fór á pallin í FLAGS-teltinum, varð avgerð tikin um, eisini at lata lítla uttandurða pallin á torginum aftur.

Boðað var frá, at tiltakið helt fram við nýggjari skerdari skrá í FLAGS-teltinum og í KÍ-høllini. M.a var ætlanin, at Kim Wilde skuldi á pall í KÍ-høllini, og at Bryan Rice skuldi á pall í FLAGS-teltinum.

Hvirla tók matteltið

Men áðrenn broytta skráin fór av bakkastokkið, hetta var umleið klokkan 18, tók ein ógvislig hvirla stóra mat- og skeinkiteltið, ið var sett upp á vegnum við Vágsbø. Hóast fólk var í teltinum og á økinum framman fyri tað, fingu hesi bert smávegis snuddir.

Eitt nú breyt ein kameramaður hjá Sjónvarpinum eitt rivjabein, men flest øll sluppu við skelkinum.Vágsbøur sá øgiligur út, við restum av teltinum, búffum, pizza-eskjum og nógvum øðrum óruddi.

Fyrireikararnir søgdu, at hvirlan, ið tók teltið, kom heilt óvart á teir.

– Vit hava havt samband við veðurmenn allan dag og hava fingið at vita, at vit kundu rokna við upp til 18 metur um sekundi, og tað átti teltið at hildið til. Men handan hvirlan var munandi harðari enn tað, segði Steintór Rasmussen við Sosialin beint eftir hendingina. Vindmátingar vístu, at hvirlurnar vóru upp til 49 metrar um sekundið tað einu løtuna.

FLAG-teltið flaksaði

Steintór vísti á, at FLAGS-teltið var fest heilt øðrvísið enn mat- og skeinkiteltið, tí varð avgjørt at halda fram í KÍ-høllini og FLAGS-teltinum. Løtu seinni fór Bryan Rice á pallin, men eftir fýra løg varð avgerð tikin um at steðga konsertini, og fáa fólk úr FLAGS-teltinum, ið var farið at flaksa dekan ov illa. Við einans KÍ-høllini eftir, og einum hægsta marki av 800 gestum í høllini í senn, valdi festivalleiðslan síðan at steðga festivalinum.

Vónbrotin fyrireikari

Steintór Rasmussen, var ein vónbrotin maður, tá vit fingu orð á hann, eftir at boðini, um at festivalurin var steðgaður, bórust.

– Tað kennist svárt at skula gevast nú. Vit høvdu eina kanónskrá í kvøld, ikki minst tann føroyski parturin, haldi eg sjálvur. Hetta er ein øgiligur missur, sjálvandi hjá okkum, men eisini hjá teimum nógvu, sum gleddu seg til kvøldið. Hetta er øgiliga keðiligt, eisini eftir, at hini kvøldini eydnaðust so væl, og fólk hevði bakkað so væl upp um okkum. Men eftir, at vit máttu lata FLAGS-teltið aftur, var ikki ráðiligt at halda fram. Vit høvdu ætla at býtt fólkið millum FLAGS-teltið og høllina, men høllin tekur einans 800 fólk, og tað kunnu vit ikki bjóða fólki. Tað er betur at gevast, um man ikki hevur nakað veruligt at bjóða fólki, segði Steintór.

Steintór greiddi frá, at avgerðin at gevast var tikin í samráð bjargingarfelagið og hinar avvarðandi myndugleikarnar.

Hann segði at enda, at hann var glaður um, at eingin álvarsligur fólkaskaðið var hendur av vindinum, og vísti á, at eingin kundi spátt um, at vit fingu ódn fyrsta vikuskiftið í august.

Ódnarveður í august

Summar Festivalurin 2007 er farin afturum, hann beyð okkum so ymiskar upplivingar, sum størsta rokkbrakið í føroyskari tónleikasøgu og hvirlur so sterkar, at festivalurin koppaði.

Steintór Rasmussen fyrireikari av Summar Festivalinum, spyr í samrøðu við okkum aðrastaðni í blaðnum:
– Hvør kundi ímyndað sær, at vit fingu ódn fyrsta vikuskiftið í august?
Ja, hvør hevði ímyndað sær tað? Sum eygnavitni til hendingina, tá mat- og skeinkiteltið brádliga varð rykt burtur av eini hvirlu, gleðist eg um, at eingin stórvegis fólkaskaði stóðst av hendingini. Upplivingin var ógvislig, og skelkandi fyri tey, ið vóru partar av henni. Veruleikin er tamm, at vit fingu ódnarveður fyrsta leygardag í august, og at harðasti hvirlurnar vóru í Klaksvík, har størsta føroyska tónleikatiltakið nakrantíð var hildið.

Ber til at hava tiltøk í Føroyum?

Í samrøðu við Sosialin hósdagin, segði ein annar av fyrireikarunum, Erik Biskoptø, at eftir mjørkan í fjør var nærliggjandi at spyrja seg sjálvan, um tað yvirhøvur bar til at skipa fyri tílíkum tiltøkum í Føroyum. Hesin spurningur hevur uttan iva aftur verið á loftið millum

fyrireikararnar, eftir at festivalurin varð avlýstur leygardagin.

Men er svarið, ið Erik sjálvur gav í Sosialinum hósdagin, enn líka rætt?

– Tað er viktigt ikki at lata seg amputera av veðrinum. Vit búgva ikki í Føroyum av praktiskum ávum. So leingi smápartafelagið Summar Festivalurin ber seg, og fólk enn bakkar upp um tiltakið, so halda vit fram.

Aftur í 2008
Í útvarpinum í gjár boðaðu fyrireikararnir frá, at tiltakið aftur verður hildið í 2008, men at tað verður flutt til aðru viku í august.
Tað er tó, nærliggjandi at hugsa, at støðan hevði verið ein onnur, um fólkaskaði hevði staðist av mat- og skeinkiteltinum, ið varð tikið av eini hvirlu, ið sambært Steintóri Rasmussen kom heilt óvart á fyrireikararnar. Hetta er sjálvandi ein tonkt støða, men tað skerst ikki burtur, at teltið við síni nógvu vekt og metalstongum fór sleingjandi oman ímóti hjálparleysu fólkunum, ið stóðu á Vágsbøi. Sama stað har mannfjøld hevði verið savnað fáar tímar frammanundan til konsertina við Amy Diamond. Lukkutíð var bøurin rættiliga tómur, júst tá hetta hendi og tey, ið endaðu undir teltinum, fingu heldur ikki stórvegis skaða.

Skrivaðu tónleikasøgu
Í Føroyum hevur náttúran ferð eftir ferð víst okkum, at hon hevur eina øgiliga megi, og leygarkvøldið vísti hon enn einaferð, hvussu stór megin er. Tí er spurningurin um, tað er ov stórur vági, at skipa fyri tiltøkum av hesi stødd?
Sjúrður Skaale frásøgumaður á stóra pallinum, segði við portal.fo leygardagin, at tá vit skipa fyri einum tiltakið í Føroyum, ið er tríggjar dagar, og tveir av hesum døgum eru í góðveðrið, so eiga vit at vera nøgd.

Bæði hósdagin og fríggjadagin var veðrið gott, og tað skerst ikki burtur, at serliga framførslan hjá Scorpions fríggjakvøldið er minnilig. Hetta var eitt tað størsta rokkbrakið í føroyskari tónleikasøgu, og 10.000 fólk vóru savnaði framman fyri pallin á Vágsbøi fyri at uppliva tað. Eiga vit, í okkara ræðslu fyri, at veðrið kann gera um seg, at grava okkum niður, og sostatt skerja okkara møguleikar at hava tílíkar upplivingar, ella eiga vit, sum Steintór Rasmussen í gjár segði við útvarpið, at vóna, at Summar Festivalurin nú hevur fingið sín part av keðiligum veðri, og at komandi festivalar verða í góðveðri. Svarið er trupult at finna, men verður nokk svarað komandi ár, tá atgongumerkini til Summar Festivalinum 2008 verða sett til sølu.

Summar Festivalurin lat dyrnar upp

Hóskvøldið á Summar Festivalinum gjørdist sera væleydnað. Hópin av fólki kom saman í góðveðrinum at hugna sær við tónleiki og í góðum veitslulag.

Tað var sum á ólavsøku í Klaksvík í gjárkvøldið, eitt slag av veitslu har fólk hittust og prátaðu. Lagið á fólki var sera gott, og nógv børn nýttu høvið at royna Silvaland, ið man vera Føroya størsta og besta spælipláss.

Stóra útlendska navnið hóskvøldið, Banaroo, fylti Flagsteltið, men eisini Høgni Lisberg savnaði nógv fólk. Tað er tó eingin ivi um, at stóra orsøkin til, at so nógv fólk savnaðist á festivaløkinum, var góðveðrið. Veðurfólk hava seinastu vikuna staðið í bíðirøð fyri at siga frá, um hvussu ringt veðrið fór at verða á Summar Festivalinum. Men veðurgudarnir vildu tað øðrvísi, um hóskvøldið skal leggja støðið fyri, hvussu veðrið verður á restina av festivalinum, so sær gott út. Um ikki, so var byrjanin í øllum førum góð.

Festival-fyrireikararnir eru framúr væl nøgdir um fyrsta kvøldið, sum í flestu mátar gjørdist nógv betri, enn teir tordu at vóna
– Tað høvdu vit avgjørt ikki væntað. Sjálvandi vónaðu vit, at nakað av lívi skuldi vera í, men at fleiri túsund fólk vóru til tiltøkini í gjár, høvdu vit als ikki droymt um, sigur Steintór Rasmussen.

At veðrið eisini skikkaði sær væl, gjørdi ikki kvøldið verri, og nú verður so hitað upp til stóra brakið í kvøld.

– Her streyma fólk til býin. Ein rúgva av bátum, húsvognum og tjaldarum eru longu komin, so alt bendir á, at her verður stúgvandi fult í kvøld, sigur Steintór.