Tutl fløgur hitta í USA

Kristian Blak setur enn einaferð Føroyar á heimskortið

Ein pakki av Tutl fløgum til eina amerikanska útvarpsstøð, hevur vakt mikla gleði millum starvsfólki, ið nú spælir nógvan føroyskan tónleik fyri amerikansku lurtarunum.

 

Á útvarpsstøðini WMPG í Portland, Maine USA er føroyskur tónleikur dominerandi á playlistanum. Á listanum yvir mest spældu jass og fólkatónleika løgini eru ikki færri enn seks Tutl fløgur millum tíggju tær mest spældu. WMPG sendir til alt Maine, men hevur suður Maine sum málbólk. Í Maine búgva umleið 1,2 milliónir fólk, so hetta er ein rættiliga stórur marknaður. Men sambært støðini hoyrist hon um størsta partin av USA, tó er ógreitt um hvussu nógv lurtað uftan fyri Maine.

 

Kristian Blak dagligur leiðari av Tutl fekk beint fyri jól eitt teldubræv frá Bob Cochran, ið er leiðari fyri jasspartin av útvarpsstøðini. Cochran hevði hoyrt sjálvnevndu fløguna hjá Eivør Pállsdóttir og var so bergtikin av henni, at hann hevði ynskt, at hann hevði hoyrt hetta útrúliga tónlistarliga verk fyrr. Á heimasíðuni hjá Eivør, hevði Cochran funnið heimasíðuna hjá Tutl og sá stóra úrvali av jassi. Tí spurdi hann Kristian, um hann kundi sent honum eintøk av føroyskum jassfløgum. Kristian so gjørdi.

 

Síðan útvarpsstøðin fekk føroysku fløgurnar er føroyski parturin av sendiskránni hjá útvarpsstøðini vorðin alt størri. Men hesa vikuna ber av, við Eivør á øðrum plássi, og nøvnum sum Lossingarmenn, Yggdrasil, Tjant, Kristian Blak og Faroeesti á listanum.
Í vikuni fekk Kristian aftur mail frá Cochran, ið greiddi frá, at bæði hann og hini starvsfólkini á útvarpsstøðini vóru sera glað fyri tónleikin á Tutl fløgunum.

 

Mest spældu jassfløgur hesa vikuna á WMPG

1. Chick Corea – The Ultimate

2. Eivør Pállsdóttir – Eivør Pállsdóttir

3. Lossingarmenn – Lossingarmenn

4. Larry Goldings – Quartet

5. Yggdrasil – Yggdrasil

6. Deanna Witkows – Length of Days

7. Tjant – Tjant

8. Kristian Blak – Addeq

9.  Faroeesti – Faroeesti

10. Thomas R. Einarsson – Let Jazz Be Bestowed OnThe Huts

 

Eivør úr Havn til Havnar

Eivør er næstu vikurnar á konsertferð úr havn til Wien, til Innsbruck, til Glasgow og so aftur til Havnar, har hon bæði skal vera havfrúgv og kann vinna heiðurin sum besta føroyska songkvinnan.

 

Konsertferð

 

Eivør hevur seinastu árini við jøvnum millubilum luttikið á konsertur hjá Yggdrasil, og var eisini við á konsertini í Tübingen, ið kom út á DVD herfyri. Sunnudagin helt Yggdrasil 15 ára føðingadagin hjá norðurlendska bólkinum í Norðurlandahúsinum. Á parti av hesi konsert var Eivør við.

 

Í gjár fór Eivør av landinum aftur á veg til Eysturríki, har hon saman við Bill Bourne fer at hava 3 konsertir. Fyrsta konsertin verður hóskvøldið kl. 19.30 í Konserthúsinum í Wien, í Mozart Høllini, ið tekur 700 fólk. Konsertirn er ein liður í eini verkætlan, har dugnaligur ungdómur úr ymsum oyggjasamfeløgum fær høvi at vísa sín kynstur. Konsertin er útseld.

Næsta konsertin verður á Porgy & Bess í Wien fríggjakvøldið kl. 20, meðan triðja konsertin verður á Treibhaus í Innsbruck mánakvøldið kl. 20.

Týsdagin 24. januar seta Eivør og Bill nøsina ímóti Glasgow, har tey mikudagin og hósdagin halda konsertir á kenda Skotska festivalinum Celtic Connection.

Leygardagin 28. januar og sunnudagin 29. januar verður Eivør aftur á heimavølli, tá hon saman við Lenu & Guðrun fer at framføra kvinnulist í Norðurlandahúsinum. 28. verður somuleiðis greitt, um Eivør aftur í ár fer at fáa heiðurin ársins føroyska songkvinna. Hon er saman við Lenu og Guðrun, Petsi Tvørfoss og Guðrið Hansen í uppskoti til hesa planet á Planet Awards, sum verða hildnir á Hotel Føroyum hetta kvøldið. Á AME 2005 tók Eivør heiðurslønina sum besta songkvinna.