Tag: Dansur

Grand Prix finala uttan Lindu og Vígdis

Koreografiin hjá danska Grand Prix vinnaranum DQ er somikið nógv broytt síðan donsku finaluna, at Vígdis Hentze Olsen og Linda Andrews eru vrakaðar áðrenn finaluna í Helsinki.

Hóast føroyska songkvinnan Linda Andrews og føroyska dansarinnan Vígdis Hentze Olsen vóru við til at tryggja danska Eurovision vinnaranum DQ atgongd til stóru evropeisku finaluna í Helsinki, so verður hvørgin teirra at síggja á pallinum leygarkvøldið, tá væntandi væl yvir 100 milliónir hyggjarar seta seg frammanfyri sjónvarpsskíggjan.

Upprunaliga skuldu bæði Linda og Vígdis við til Finlands, og Linda hevur somuleiðis sungið kór á upptøkunum av vinnaralagnum Drama Queen, ið hevur verið nógv at hoyrt í Danmark. Men tá avtornaði, fingu Linda og Vígdis at vita, at tær ikki sluppu við til Finlands. Tað er koreografurin hjá Danmarks Radio, ið hevur lagt framførsluna hjá DQ til rættis, sum hevur vrakað føroysku luttakarnar. Grundgevingin var, at Linda ikki dugur nóg væl at dansa og at Vígdis ikki dugur nóg væl at syngja. Nýggja koreografiin kravdi, at talan var um dansandi kórsangarar, og so var ikki pláss til ikki dansandi kórsangarinnuna Lindu og ikki syngjandi dansarinnuna Vígdis. Sostatt mugu føroyingar brynja seg við toli, tað verður sostatt minst eitt ár inntil vit á fyrsta sinni sleppa at uppliva ein føroying í Eurovision finaluni ella í grand prixnum, sum tað eitur á góðum gomlum føroyskum.

Hava dansað saman í 20 ár

Rannvá Káradóttir og Kristina Sørensen vóru sera væl nøgdar við framførslurnar av Rout Entry, tá vit fingu orð á tær. Báðar hildu, at hetta hevði riggað væl, og fyrstu afturmeldingarnar vóru jaligar.

“Vit hava dansa saman, síðan vit vóru 10 ár og byrjaðu at ganga til dans hjá Elsu Mariu”, greiðir Kristina Sørensen frá. Síðan hetta hava hon og Rannvá Káradóttir arbeitt saman í nógvum ymiskum verkætlanum. Tá tær so báðar endaðu á London Contemporary Dance School, var natúrligt at samstarvið helt fram. Hetta hevur givið føroyingum, bretum og danum fleiri spennandi framførslur, ikki minst framførsluna, ið varð gjørd til Dansolution kappingina í fjør. Saman við skúlafelaganum Seke Chimutengwende gjørdu tær eitt stykki, og dansaðu seg til sigurin í stóru donsku kappingini á Dansescenen á Østerbro í Keypmannahavn. Hesin sigur gav teimum møguleikan at gera stykkið Rout Entry, ið tey júst hava víst á Dansescenen.

 

Skapt í samstarvi

Rannvá Káradóttir meldaði seg til Dansoloution og fekk skúlafelagarnar Kristinu og Seke við sær sum dansarar. Rannvá er koreografur á verkætlanini. Men stykkini eru í stóran mun skapt í felagskapi greiðir Kristina frá, “Vit koma øll við uppskotum um rørslir. Men tað er eisini gott, at ein hevur endaligu avgerðina, soleiðis at vit koma víðari”.

 

Kundu fáast bert við koreografi

Rannvá greiðir frá, at tað var øgiliga stuttligt at arbeiða við hesum stykkinum. Tí her fingu tey møguleika at arbeiða bert við koreografi. Ofta er so nógv annað, ið upptekur tíðina. Tú stendur sjálv fyri at skaffa fígging, gera PR og fyriskipa alt tað praktiska. Men hesuferð stóð Dansescenen sum framleiðari, og tók sær av øllum tí praktiska. Tey fingu somuleiðis løn frá Dansescenen fyri arbeiði. Hetta gjørdi, at tey kundu brúka alla orkuna til koreografi.

 

Jaligar afturmeldingar

Tær eru báðar væl nøgdar við framførslurnar, nú tær eru lidnar á Dansescenen og í næstum fara á ferð til Århus við Short Stories. Kristina sigur, at áskoðararnir hava tikið væl ímóti teimum, og afturmeldingarnar hava verið jaligar.

 

Fyribils í Keypmannahavn

Kristina og Rannvá hava verið nógv í Danmark seinasta árið. Fyrst í sambandi við Dansolution og so í sambandi við Rout Entry. Kristina er flutt til Keypmannahavn og verður her fyribils hetta árið. Aftan á tað, kann leiðin ganga nógv ymisk støð, ella kanska verður hon verandi. Hon sigur, at hon hevur nógvar og spennandi ætlanir, men vil helst ikki avdúka tær enn. Okkurt er tó alment, hon skal saman við Ránnvá millum annað luttaka á Ung I Norden í Føroyum í summar, og báðar eru eisini við í operaini hjá Sunnleivi Rasmussen, ið verður sett upp í Føroyum í heyst.

Kristina sigur, at London var ein feit uppliving. Men samstundis var sera dýrt at liva har. Í tíðarskeiðum har minnið var at gera, var tað sera hart at klára seg. Kappingin er eisini sera hørð í London. Í Danmark er munandi lættari. Eitt nú hevur tú atgongd til ókeypis venjingarhøli, ja alt er eitt sindur lættari. Tað, at sjeikurin býr í Keypmannahavn dregur ivaleyst eisini. So tí er Kristina ikki greið yvir um hon nakrantíð aftur flytur til London.

 

Heimsborgarin Rannvá

Hvar Rannvá býr er eitt sindur truplari at fáa greiðu á. “Eg haldi ikki at staðið hevur so nógvan týdning” sigur hon, “Tað eru verkætlanirnar, ið avgera hvar eg eri. Eg havi stutt síðan verið í Berlin, og nú eri eg her. Eg skal nú undir at arbeiða við, stykkinum Investigation Of A Dog saman við tónasmiðinum Trónda Bogasyni og basunleikaranum Andrass Olsen. Hetta er eitt stykkið, ið er bygt á eina Kafka stuttsøgu, og sum verður einar 70 minuttir, tá tað er liðugt. So eg veri ivaleyst rættiliga nógv í Danmark komandi árið.” Rannvá hevur eisini eitt tilboð, um at gerast húskoreografur á Grand Teatrinum í Århus í eina tíð, men nær hetta verður og hvussu leingið er ikki heilt greitt enn.

 

Listabland

Kristina gjørdi herfyri eitt stykkið saman við Dánjal á Neystabø á Skole for moderne dans. Hetta stykkið varð eisini sýnt í Føroyum, og hetta at samstarva við listafólk innan aðrar listagreinar er nakað, ið Kristina metur vera sera áhugavert. Hon kundi hugsa sær, at gjørt meira av tílkum, og t.d. at fingið ein sjónleikara við, soleiðis at dansur, tónleikur og sjónleikur kundu virkað saman í eini framførslu.

 

Aftur á pall saman

Umframt operaina og Ung i Norden hava Rannvá og Kristina ikki nakrar beinleiðis samstarvsætlanir í næstum. Men tað tykist tó eingin ivi at vera um, at hesar báðar verða aftur at síggja á palli saman. Báðar vísa á, at tað ikki eru so nógvir føroyingar, ið fáast við modernaðan dans, tí er samstarvið rættiliga upplagt.

 

Stuttsøgur í kolonihavanum

Rannvá Káradóttir, Kristina Sørensen og Seke Chimutengwende framførdu stuttsøgu í dansilíkið á Dansescenen í Keypmannahavn í síðstu viku. Stuttsøgan Rout Entry gjørdist ein sera jalig uppliving.

Dansescenen á Østerbro var ílatin sum ein kolonihavi fýra kvøld í farnu viku, tá hølini løgdu pall til Short Stories – Nu med havenisse. Fimm stuttsøgur í dansilíki lagdar til rættis av fimm ymiskum koreografum. Millum koreografarnar var Rannvá Káradóttir, ið eisini dansaði sjálv saman við føroysku Kristinu Sørensen og Londonbúgvanum Seke Chimutengwende.

 

Páskaliljur og fuglabað
Innanfyri dyrnar stóð ein urtagarðsvættur millum urtapottar við hálvdeyðum páskaliljum. Allastaðni vóru blómir og reyðternuttir dúkar. Mitt innið millum áskoðaraplássini var eitt fuglabað, aðra staðni stóu uppaftur fleiri urtagarðsvættrar. Í barrini seldu tey kaffi, pokalpilsner, reyðar sodavatnir við súgvipípu og sandkakupetti. Hóast onkur hevði gloymt at vandað blómurnar, sum tí vóru følnaðir, so var eitt slag av vári í luftini. Hetta var stuttligt og gjøgnumført, og tað var ikki sørt spennandi at vita, hvussu dansurin passaði inn í hesar karmar.

 

Tað ljóta er flott
Hetta var so gjøgnumført, at eg bilti mær inn, at kolonihavin mundi vera tema í stuttsøgunum eisini. Tí gjørdist eg ikki sørt kløkkur av, hvussu illa fyrsta stykkið passaði inn í karmarnar. Stykkið Many Faced Man er eitt sterkt rættiliga andskræmiligt og samstundis sterkt andaligt stykki, ið byggir á brot úr Bíbliuni. Dansarin Eric Butler var bergtakandi, og ljóðsporið var flott. Tað ljóta var heilt øgiliga flotta. Tíanverri hevði koreografurin Helen Saunders roynt at koma dekan ov víða um, og stykkið misti styrkið í fleiri brotum, ið ikki livdu upp til sterku byrjanina.

 

Ørkymlandi samspæl
Heldur ikki næsta stykkið hevði nógvan kolonihavadám yvir sær. Eg havi seinnið skilt á Rannvá Káradóttir, at koreografarnir einki vistu um hetta kolonihava karmarnar fyrr enn beint áðrenn framførslurnar. Hetta var eitt hugskot, ið bert var galdandi fyri karmarnar ikki fyri framførslurnar. Eg haldi satt at siga, at hetta virkaði eitt sindur ørkymlandi.

 

Látur og geisp
Stykkið Forestillinger er lagt til rættis av Kasper Daugaard Poulsen. Hvat ein tílík framførsla gjørdi á einum virdum palli sum Dansescenen, skilji eg ikki. Stykkið er bygt á tríggjar upplivingar av sama dansi. Tær báðar í dansaðu gálvaðu og vinglaðu runt á pallinum í nøkur ávís mynstur, fyrst ílætnar jogging draktir, síðan í latex kynslívsklæðum og at enda ílatnar stórar bamsidraktir. Hetta fekk fleiri av áskoðarunum at flenna harðmæltir, meðan eg saman við fleiri av hinum áskoðarunum geispaðu.

 

Keld og Hilda
Síðan skuldi nýtt undirlag leggjast á pallin. Áðrenn stykkið Rout Entry hjá Dansolution vinnaranum skuldi vísast. Tí var ein longri steðgur, har vit aftur vórðu flutt inn aftur í koloniurtagarðin. Vit kundu keypa okkum nýggjar reyðar sodavatnir í urtagarðsbarrini. Í hátalarunum sungu Keld og Hilda Heick og onnur dansktop nøvn, heilt til klokkan ringdi. Steðgurin var av, enn einaferð skuldu vit kasta koloniurtagarðin av okkum og uppliva dansin.

 

Vinnandi samstarv
Rout Entry er skapt í samstarvi millum Rannvá Káradóttir, Kristinu Sørensen og Seke Chimutengwende. Tey hava øll gingið á London Contemporary Dance School og hava samstarvað í ymiskum verkætlanum. M.a. vunnu tey Dansolution í september í fjør. Tey dansa eisini sjálvi í Rout Entry. Stykkið er í fleiri ymiskum partum. Í fyrsta parti høvdu tey hvør sína pútu við á pallin- Pútan varð á onkran hátt berandi luturin í dansinum hjá hvørjum einstøkum dansara. Tey stóu á henni, lógu á henni og veipaðu við henni. Framførslan var knýtt at pútunum, og hesin ósannlíki dansilutur  riggaði væl. Tann annars næstan fullkomna synkroniseringin av dansinum, gjørdist enn týðiligari av ótemjandi pútunum, ið ikki kundu synkroniserast í líka stóran mun. Kristina segði seinni, at tey høvdu arbeitt nógv við pressisión í púturørslunum. Hon mintist íkki heilt, hví, tað endaði við, at verða pútir tey arbeiddu við. Rannvá greiddi frá, at tey fegin vildu arbeiða við onkrum, ið ikki var heilt vanligt. Hetta er sama drívmegi, ið gjørdi at tey brúktu bananir í framførsluni á Dansolution. Tað at eksperimentera við óvandum umstøum er avbjóðandi, og ger arbeiði meira spennandið.

 

Hesin fyrsti partur av framførsluni virkarði sera sterkur, dansurin uttan tónleik, frálíka synkroniseringin og tilvitaðu brotini í synkroniseringini skaptu lív í framførsluna.

 

Veikar yrkingar
Veikasta liðið er teksturin, ið best kann lýsast sum eitt slag av yrkingum. Tað er Seke Chimutengwende, ið hevur skrivað hann. Orðini tyktust rættiliga konstrueraði, og framberingin hjá Seke av tekstinum tyktist eitt sindur kroyst. Eg trúði honum ikki. Hóast bretska accentin var sjarmerandi, lyfti, lespandi Lodon málið ongantíð tekstin upp um tað pátikna. Men teksturin spældi ikki nóg stóran leiklut, til at draga restina niður.

 

Stykkið teknar samanspælið millum Seke og tær báðar. Eitt slag av dialogi við dansi. Rørslurnar hjá Rannvá og Kristinu vóru næstan dukkukendar og mekaniskar, og skaptu myndina av Seke sum dukkuførara. Tá tónleikurin kom inn í stykkið, var talan um tónleik við einum svakligum dámi yvir sær. Mekanisku rørslurnar og ágangandi tónlekurin skapti ørar myndir, ið hildu áskoðaranum rúnarbundnum. Í mun til hini stykkini, megnaði Rout Entry, at halda áskoðaran áhugaðan. At Rannvá, Seke og Kristina hava arbeitt saman, sást á góðu kemiini á pallinum. Framførslan var sera flott.