Tag: Kristian Blak

Tutl fløgur hitta í USA

Kristian Blak setur enn einaferð Føroyar á heimskortið

Ein pakki av Tutl fløgum til eina amerikanska útvarpsstøð, hevur vakt mikla gleði millum starvsfólki, ið nú spælir nógvan føroyskan tónleik fyri amerikansku lurtarunum.

 

Á útvarpsstøðini WMPG í Portland, Maine USA er føroyskur tónleikur dominerandi á playlistanum. Á listanum yvir mest spældu jass og fólkatónleika løgini eru ikki færri enn seks Tutl fløgur millum tíggju tær mest spældu. WMPG sendir til alt Maine, men hevur suður Maine sum málbólk. Í Maine búgva umleið 1,2 milliónir fólk, so hetta er ein rættiliga stórur marknaður. Men sambært støðini hoyrist hon um størsta partin av USA, tó er ógreitt um hvussu nógv lurtað uftan fyri Maine.

 

Kristian Blak dagligur leiðari av Tutl fekk beint fyri jól eitt teldubræv frá Bob Cochran, ið er leiðari fyri jasspartin av útvarpsstøðini. Cochran hevði hoyrt sjálvnevndu fløguna hjá Eivør Pállsdóttir og var so bergtikin av henni, at hann hevði ynskt, at hann hevði hoyrt hetta útrúliga tónlistarliga verk fyrr. Á heimasíðuni hjá Eivør, hevði Cochran funnið heimasíðuna hjá Tutl og sá stóra úrvali av jassi. Tí spurdi hann Kristian, um hann kundi sent honum eintøk av føroyskum jassfløgum. Kristian so gjørdi.

 

Síðan útvarpsstøðin fekk føroysku fløgurnar er føroyski parturin av sendiskránni hjá útvarpsstøðini vorðin alt størri. Men hesa vikuna ber av, við Eivør á øðrum plássi, og nøvnum sum Lossingarmenn, Yggdrasil, Tjant, Kristian Blak og Faroeesti á listanum.
Í vikuni fekk Kristian aftur mail frá Cochran, ið greiddi frá, at bæði hann og hini starvsfólkini á útvarpsstøðini vóru sera glað fyri tónleikin á Tutl fløgunum.

 

Mest spældu jassfløgur hesa vikuna á WMPG

1. Chick Corea – The Ultimate

2. Eivør Pállsdóttir – Eivør Pállsdóttir

3. Lossingarmenn – Lossingarmenn

4. Larry Goldings – Quartet

5. Yggdrasil – Yggdrasil

6. Deanna Witkows – Length of Days

7. Tjant – Tjant

8. Kristian Blak – Addeq

9.  Faroeesti – Faroeesti

10. Thomas R. Einarsson – Let Jazz Be Bestowed OnThe Huts

 

Herðaklappið hjá Kristian

Maðurin aftan fyri 250 føroyskar tónleikaútgávur seinastu 28 árini, Kristian Blak, fekk serliga Planet Herðaklappið. Hetta var ordiliga skeg heldur Kristian.

 

Planet Awards

 

Tað var ein fegin Kristian Blak, ið fekk Planet Herðaklappið á Planet Awards leygarkvøldið. Men eisini konan Sharon var glað, hon segði, at hon hevði ynskt sær eina Planet heiðursløn at stilla á hyllina í stovuni. Tað er nevniliga sonur Kristian og Sharon, Sámal og vinmaður hansara David Geyti, ið hava gjørt snotiligu planetirnar. Sharon var tó serliga glað vegnað Kristian, tí hon helt mann sín hava uppiborið eitt tílíkt herðaklapp fyri sítt arbeiði fyri føroyskan tónleik, og hvør man vita tað betur enn júst konan hjá hesum arbeiðssama manni.

 

Kristin segði í spølni, at honum hevði dámt planetina so væl, at hann hevði hugsað um, at biðið Sámal um at gera eina eyka planet, sum tey kundu fáa hetta pena listaverk. So tað er bara gott, at eg vann eina heldur Kristian.

 

Hann er stoltur av, at Sámal bleiv biðin um at gera planetirnar: ”Hann er ein dugnaligur drongur. Hann hevur gjørt eitt stórt og gott arbeiðið við planetunum, og man gleðist jú tá onkur í familjuni ger nakað serligt”.

 

Kristian sigur annars, at hann gjørdist ikki sørt kløkkur, tá Jan Müller nevndi hansara navn av pallinum. “Hatta var eitt ordiligt yvirraskilsi – Men tað var samstundis skeg  at hoyra, fólk rópa mítt navn, tá eg kom á pallinum.”, sigur Kristian.

 

Kristian hevur virkað í føroyska tónleikaídnaðinum síðan 1974 og hevur nærum øll árini verið ein slóðbrótari. Spurdur um menningina í føroyskum tónleiki seinastu 32 árini, sigur Kristian, at menningin hevur verið sera stór, bæði í tali og í góðsku á útgávum.  Kristian byrjaði sum útgevari í 1977 og tey 18 árini fram til 1995, gav TUTL 50 útgávur út. Seinastu 10 árini hevur felagið givið út fleiri enn 200 fløgur. Kristian heldur, at tvinnar høvuðsorsøkir eru til hetta. Digitaliseringin hevur gjørt sjálvt arbeiðið við at gera fløgur munandi lættari. Hin orsøkin er broytingin innan føroyskan popp- og rokktónleik fyrst í 90’árunum. Bólkar fóru frá at spæla løg hjá øðrum til at spæla egið tilfar, at hesum sprottu nógvar útgávur.

 

Kristian heldur eisini, at serliga seinastu árini er nógv hent við góðskuni á útgávunum, tónleikararnir eru á høgum støði og hava nógvan sjálvkritikk. Hetta hevur havt við sær, at nakrar sera góðar fløgur eru komnar út. Kristian sigur, at avbjóðingin hjá TUTL, nú liggur í at liva upp til ábyrgdina, ið tann høga góðskan leggur á herðarnar á felagnum. Planet Awards gjørdist eitt sera gott kvøld hjá TUTL, við hópin av nøvnum í uppskoti og fleiri í millum vinnararnar.

 

Ein av bólkunum, ið hevur givið eina góðsku fløgu út á TUTL í 2005, er 200. Mikael sonur Kristian spælir  bass í bólkinum. 200 vann planetina fyri besta bólk. Kristian er sera glaður fyri, at Mikael fekk hendan heiður, men eisini vegna Niels og Una. Tí teir spæla øgiliga væl og hava givið eina sera góða fløgu út, ið hevur sligið navnið hjá 200 fast, sigur Kristian.